Mamlakatimizda 24 oktyabr kuni Oʻzbekiston Respublikasi Prezidentligiga oʻtkaziladigan saylovga qizgʻin tayyorgarlik jarayonlari ketmoqda. Ushbu saylovni xalqaro normalar va milliy qonunchiligimiz asosida tashkillashtirish va uni oʻtkazish Saylov qonunchiligimizni tarixiy-tadrijiy davridan farqli oʻlaroq bugungi globallashgan zamonda Respublikamizni dunyo miqyosida oʻrni (mavqeini) belgilab beradigan omillaridan biri hisoblanadi. Chunki, saylovlarning shaffofligi bevosita mahalliy va xorijiy kuzatuvchilar, ommaviy axborot vositalari vakillari tomonidan kuzatib borilishi qonunchilikda belgilangan.“Bu jarayonlarda sud hokimiyatining roli qanday?” degan haqli savol tugʻiladi.
Toʻgʻri, qonunchilikka koʻra, sudyalar tomonidan nomzodlar bilan bogʻliq toʻgʻridan-toʻgʻri targʻibot ishlarini olib borishiga yoʻl qoʻyilmaydi, biroq sudlar (Maʼmuriy sudlar) Saylov komissiyasining xatti-harakatlari (qarorlari) ustidan berilgan shikoyatlarni koʻrib chiqadi. Bu esa davlatchilik tarixida saylovlarning qonun va adolat normalari asosida oʻtkazilishining shartlaridan biri hisoblanadi. 
Jumladan: Saylov komissiyasining xatti-harakatlari (qarorlari) ustidan berilgan shikoyat sud tomonidan shikoyat berilgan kundan eʼtiboran uch kundan kechiktirmay koʻrib chiqilishi belgilangan. Agar saylovga olti kundan kam vaqt qolgan boʻlsa, darhol koʻrib chiqilishi lozim. Shikoyat sud tomonidan arizachini va tegishli saylov komissiyasining vakilini, shuningdek, prokurorni, agar shikoyat arizachiga emas, balki boshqa fuqaroga daxldor boʻlsa, oʻsha shaxsni, yaʼni manfaatdor shaxsni ham chaqirgan holda koʻrib chiqiladi. Bu shaxslarning kelmasligi ishni koʻrib chiqishga toʻsqinlik qilmaydi. Sudning hal qiluv qarori chiqarilishi bilanoq darhol tegishli saylov komissiyasiga va arizachiga topshiriladi. Mazkur holatda muddatlar boshqa toifadagi ishlarga nisbatan qisqa va tez muddatda koʻrib chiqishni taqozo qiladi.