Баҳорнинг серёғин келиши ва табиатнинг бошқа инжиқликлари оқибатида аҳолига, турар жойларга ҳамда қишлоқ хўжалиги экин майдонларига етказиладиган талофатнинг олдини олиш борасида Тойлоқ туман Фавқулодда вазиятлар бўлими ходимлари туман ҳокимлиги билан биргаликда бирмунча ишларни амалга оширмокдалар. Жумладан, туман худудида ФВДҚТ йиғма отрядлар шакллантирилди ҳамда куч воситалар ва техникаларни етарлича жамлаш борасида ШТБлар ташкил этилди; ҳар бир худудда тузилган ишчи гурухлар фаолият олиб бормокда. Чунончи, Давлатобод Жумабозор, Чароғбон, Боғизоғон ҳамда Ғўлба маҳаллаларида сув тошқинлари рўй бериб, фавқулодда вазиятлар содир бўлганда тўғри ҳаракатланиш борасида тарғибот-ташвиқот тадбирлари амалга оширилди. Ушбу йўналишдаги ишлар қатъий назоратга олинган. Ходимларимиз томонидан тун-кун навбатчилик ташкил этилган. Ёнғинни бартараф этиш махсус автомашинлари ва ўт ўчирувчилар шахсий таркиби шай ҳолатга келтирилган. Жойларда сел тошқини бўйича йўриқнома ва плакат эслатмалар тарқатилиб, профилактика ишлари амалга оширилмокда.
Шу ўринда сел келиши хавфи содир бўлганда аҳолининг ҳаракатланишига доир
Э С Л А Т М Ани эътиборингизга ҳавола этишни лозим деб топдик:
Сел – бу кучли ёмғир туфайли тўсатдан рўй берадиган хавфли сув оқими бўлиб, тоғ тошлари, қум ва тупроқ жинслари билан биргаликда содир бўлади. Шунингдек, сув омборлари ўпирилиши, тоғ қорлари эриши ёки сурункали жала қуйиши натижасида юзага келадиган хавфли жараён ҳамдир. Катта ҳажм ва юқори тезликка эга бўлган сел оқими, ўз йўлидаги барча халқ хўжалиги ва гидротехник иншоотларини аҳоли уй-жойларини бузиб, қишлоқ хўжалик экинларини пайхон қилади. Одамлар ва ҳайвонларни ҳалок қилади. Сел оқимининг давомийлиги 0,5-2 соатдан 12 соатгача, тезлиги 5-8 м/с дан 12 м/с гача етиши мумкин. Сел массасининг зичлиги эса 1,2 -1,9т/м кубни ташкил этади.
Сел оқимлари ўзи билан олиб келаётган қаттиқ заррачалари ўлчамига қараб 3 гуруҳга бўлинади: сув–тошли, лойқа ва аралаш селлар.
Сел келиши хавфи юқори бўлган мавсумда:
- Хавфли худудларга саёҳат қилишдан воз кечинг
- Сел йўналишлари ва кескин қияликлардан узоқроқ бўлинг.
- Хавфли жойлардаги йўллар бўйлаб автотранспортда ҳаракатланишдан ҳам воз кечинг
- Ҳокимлик ҳамда маҳалла қўмитаси ахборотларини кузатиб боринг.
Сел келиш хавфи юзага келганда:
Дарҳол олдин белгилаб олинган йўналиш бўйича хавфсиз жойга кўчишни бошланг, ўзингиз билан зарур ва қимматли буюмларни олинг. Ҳаракат йўналишингиз сел йўналишига тўғри келмасин.
Унутманг, сел оқими ўтиб кетганидан сўнг сел йўлига тушиш қатъиян ман этилади, чунки яна бошқа оқим пайдо бўлиши мумкин.
Кўчириш пайтида сел йўлидан ўтманг. Ўпирилган соҳилга яқин жойлашган биноларни шунингдек уй тагидаги тупроқ қисман ювилиб кетган бўлса, бундай жойларни тарк этиш кераклигини ёдда тутинг!
Шоҳжаҳон ХУДОЙҚУЛОВ,
туман ФВБ ФВДТ ФМ бошлиғи, лейтенант.
комментариев