Вазирлар Маҳкамасининг шу йил 12 августда “Олимпия захиралари коллежлари фаолиятини ташкил этиш чора-тадбирлари тўғрисида”ги қарори қабул қилинди. Унга кўра, Самарқанд шаҳридаги ҳамда Тойлоқ туманидаги ихтисослаштирилган олимпия захиралари мактаб-интернатлари эндиликда, “олимпия захиралари коллежлари” деб юритиладиган бўлди.Олимпия захиралари коллежларида таълим жараёни икки босқичда яъни, умумий ўрта таълим VII-XI синфлар ҳамда ўрта профессионал таълим XI синфдан кейинги бир йиллик таълим босқичларида амалга оширилади. Коллежнинг асосий фаолияти жисмоний тарбия ва спорт соҳасидаги юқори малакали мутахассислар ҳамда спортнинг олимпия турлари бўйича терма жамоаларни шакллантириш учун спорт захирасини тайёрлашга йўналтирилади.

Шунингдек, 2020-2021 ўқув йилидан бошлаб олимпия захиралари коллежларининг ўрта профессионал таълим босқичида футбол бўлимлари ташкил этилади ва уларда футбол бўйича мутахассислар (спортчилардан ташқари) тайёрланади.
Қарорга мувофиқ, Ўзбекистон Республикаси Жисмоний тарбия ва спорт вазирлиги, Халқ таълими вазирлиги ҳамда Олий ва ўрта махсус таълим вазирлиги 2020-2021 ўқув йилига қадар умумий ўрта таълим ҳамда ўрта профессионал таълим жараёнининг узвийлигини ва спорт маҳоратини узлуксиз ўстиришни таъминлашни ҳисобга олган ҳолда ўқув режа ва дастурларини ишлаб чиқади.
Коллежларни замонавий педагогик технологияларни эгаллаган малакали кадрлар ҳамда тренерлар билан тўлдириш юзасидан зарур чоралар кўрилади.