» » Спорт якка курашлари «малика»си

Спорт якка курашлари «малика»си

Икки карра жаҳон, кўп бора Осиё чемпиони, ўнлаб халқаро мусобақаларда шоҳсупага кўтарилган машҳур полвон қизимизнинг муваффақиятлари мухлису мутахассисларни ҳайратга солмоқда.

Гулмира Исматова — 1985 йилда туманимизнинг  Каттақишлоқ қишлоғида ишчи оиласида туғилган. Тумандаги 18 ва 54-мактабларда, шунингдек, Тойлоқ олимпия захиралари коллежида таҳсил олган. Спорт яккакурашларининг миллий кураш, самбо, белбоғли кураш, дзюдо, эркин кураш, турон якка кураши каби йўналишлари бўйича гиламга тушиб, уларнинг барчасида муваффақият қозонган оз сонли кураш усталаридан бири. У халқаро тоифадаги спорт устаси, «¤збекистон ифтихори» кўкрак нишони соҳибасидир.

...Айтишларича, қизалоқ дунё юзини кўрган жавзо ойининг ўн тўртинчи кунидан бир ҳафта ўтгач, унинг бобоси, Иккинчи жаҳон уруши қатнашчиси Асрор ота Исматов гўдакнинг қулоғига азон айтиш асносида: «Шу неварам полвон қиз бўлсин!» деб, ният қилган экан. Бу қанчалик ҳақиқат билмадиму лекин, қизимиз ўқиган мактабда бир пайтлар муаллимлик қилганим учун чаққон ва чайир Гулмирага нафақат синфдошлари, балки каттароқ ёшдаги қизлар ҳам ҳайиқиброқ муомала қилганлигига гувоҳ бўлганман.

— Мактабда жисмоний тарбия фанини кўпроқ яхши кўрардим, —дейди Гулмира Исматова. — Биринчи Президентимиз Ислом Каримов ташаббуси билан миллий курашимизнинг довруғи бутун жаҳонга таралганда, ҳеч иккиланмай спортнинг шу турини танладим. Коллежда спорт сирларини қунт билан ўргандим.

Айниқса талабчан устозим, — самбо бўйича уч карра жаҳон, тўққиз марта Осиё чемпиони, «¤збекистонда хизмат кўрсатган спортчи» Шавкат Жўраевдан кўп нарсани ўргандим. Мураббий менга: «ўалаба қозонишни истасанг, аввало ўзингдаги ишончни йўқотма, катта ёки кичик мусобақа бўлсин барчасига пухта таёргарлик кўр; муваффақиятнинг  асосий омили — тинимсиз ва машаққатли меҳнатдир» дея маслаҳат берарди.

Гулмира устозлари ўгитларини қалбига жо қилиб олди; ҳар бир кўрсатмасини бекаму кўст бажаришга интилди, янги-янги усулларни ўзлаштириб борди.

Ниҳоят, орзуси ушаладиган онлар ҳам етиб келди. Кураш бўйича 2005 йилда пойтахтимиз мезбонлик қилган жаҳон чемпионатида саралаш баҳсларини соф Қалабалар билан якунлаган Гулмира финалда Янги Зеландия вакилига рўпара келди.

— Рақиб анча кучли эканлиги илк тўқнашувдаёқ яққол сезилди, — дейди Г. Исматова ўша «жанг»ни эслаб. Устозларимдан ўрганган усулларни бирма-бир қўллашга интилдим... Улар мени руҳлантиришга ҳаракат қилишарди, мухлисларнинг қийқириғи тинмайди. Ортда эса Ватан шаъни, бобом, ота-онамнинг дуоси турибди. Қандайдир куч вужудимга кириб келгандек бўлди. Рақибамнинг билагидан маҳкам тутганча елкам узра ошириб ташладим.

У гиламга чалқанча тушди! «Ҳалол!» Ўакамнинг фақат шу сўзи қулоғимга чалинди. «Ҳалол!» шу биргина сўз миллионлаб мухлисларни, мураббийларимни, барча-барчани қувонтирди. Шоҳсупа ёнида ҳаяжонда энтикиб турганимда, сухандоннинг «Олтин медаль соҳибаси ва жаҳон чемпиони Гулмира Исматова!» деган салобатли овози вужудимни куйдиргандек бўлди. Мадҳиямизни мухлислар билан бирга ижро этарканман, кўзларимдан севинч ёшлари тинмай оқарди... Илк жаҳон чемпионлиги менга ана шундай катта шодлик бахш этган.

Бундай унутилмас фарахбаш лаҳзаларни полвон қизимиз фаолияти давомида кўп бора бошдан кечирган. Мағлубият аламини тотиб кўрган дамлари ҳам бўлган.

Аксарият, таниқли спорт юлдузлари ўттиз ёшга етгандан сўнг катта спорт билан хайрлашишади. Фақат Гулмира эмас. Чунки, у полвонлар элининг фарзанди. «Ўзбек Барчинойи» турли даражадаги мусобақаларда 100 дан ортиқ медалларни қўлга киритди. Биргина мисол: 2017 йилда Ашхободда бўлиб ўтган Осиё ўйинларида бир неча кураш туридан гиламга тушиб, мамлакатимиз медаллар шодасини нақ 5 тага бойитди.

Гулмира 34 баҳорни қаршилаётган бўлса-да олимп чўққисини забт этиш ниятидан воз кечган эмас. У айни пайтда самбо ва эркин кураш бўйича бу йилги мамлакат чемпиони сифатида Осиё чемпионатига тайёргарлик кўраяпти. Курашнинг юқорида таъкидланган турлари Олимпия ўйинлари дастурига киритилганлигини инобатга оладиган бўлсак, қизимиз олий мақсади рўёби сари астойдил интилишига шубҳа йўқ.

Чунки Гулмира барча оддий ўзбек қизлари  каби суҳбатда назокатли, муомалада самимий, оқ кўнгил бўлгани ҳолда кураш гиламида ҳақиқий шерга айланади... У ўзбегимнинг чинакам ифтихори, спорт курашлари «маликаси»дир.


комментариев