Маржона Тайлонова Тойлоқ туманининг иккинчи сектор ҳудудига қарашли “Қўрғонча” маҳалла фуқаролар йиғинида яшайди.У “Ёшлар дафтари”да рўйхатда бўлган. Битта тикув машинаси олиш учун мурожаат қилиб келган М.Тайлоновага сектор раҳбари ва штаб аъзолари томонидан тижорат банкларнинг имтиёзли кредитлари ҳақида тушунчалар берилиши натижасида у банкдан 30 миллион сўм имтиёзли кредит олиб, ўз тадбиркорлигини йўлга қўйишга бел боғлади.
- Иккинчи сектор раҳбарининг ёрдами билан менга имтиёзли кредит асосида битта эмас, бир йўла 7 та тикув машинаси олиб берилди, - дейди ёш тадбиркор М.Тайлонова. - Натижада “Жанона Асилзода тикув цехи” МЧЖ га асос солдим. Шу орқали яна қўшимча 7 нафар ишсиз юрган хотин-қизларнинг бандлигини таъминлашга ҳам эришдим. Менга шундай шароитларни яратиб берган Президентимиз ва сектор раҳбарларидан мамнунман.
Бундан ташқари, туман иккинчи сектори раҳбарининг амалий ёрдам билан ташаббускор Райхона Аҳроровага “Ўзбекистон Почтаси” акциядорлик жамияти Самарқанд филиалининг Тойлоқ почта алоқа боғланмаси балансида бўлган 4 та хонадан иборат бино ижара шартномаси орқали олиб берилди. Натижада Р.Аҳророва туманда “Тойлоқ рақамли технологиялар маркази” МЧЖ ни ташкил қилди.
- Марказда, ахборот технологиялари билан боғлиқ ўқув курслари ташкил этилиб, ҳар куни 3 та гуруҳда ёшлар “Компьютер саводхонлиги”, “Веб дастурлаш”, “PYTHON”, “Photoshop” ва “Робототехника” йўналишларида таҳсил олишмоқда, -дейди Р.Аҳророва. - Йўналишига қараб ёшлар икки-ойдан, тўққиз ойга қадар ўқитилади. Ўқув курслари якунида битирувчиларга марказнинг махсус сертификатлари берилади.
Бундан ташқари, марказда инглиз тили курслари ҳам ташкил этилиб, ёшларга инглиз тили чуқурлаштирилган ҳолда ўргатилмоқда.
Шу ўринда айтиш керакки, Тойлоқ туманидаги иккинчи сектор ҳудудига 12 та маҳалла киритилган бўлиб, мазкур маҳаллалардаги 9020 та хонадонларда жами 50123 нафар аҳоли истиқомад қилади.
- Сектор томонидан ўтказилган ҳатловлар натижасида “Темир дафтар”га жами 477 та оила киритилган. Эҳтиёжманд оилаларга кўрсатилган мунтазам ёрдамлар ва меҳнатга лаёқатли ишсизларини иш билан таъминлаш натижасида шу кунга қадар жами 400 та оила эҳтиёжмандлар рўйхатидан чиқарилди, - дейди Тойлоқ туман прокурори, иккинчи сектор раҳбари Асомиддин Сайпиддинов. - “Аёллар дафтари”га жами 484 нафар ижтимоий ҳимояга муҳтож аёллар киритилган. Шундан 284 нафари ишсиз, 53 нафари боқувчисини ёқотган, 78 нафар ногиронлиги бўлган аёллар, 3 нафар қаромоғида ногирон болалари бўлган аёллар, 14 та уй-жойи таъмирлашга муҳтож бўлган биринчи гуруҳ ногиронлари, 13 нафар ҳуқуқий ёрдамга муҳтож бўлган аёллар, яна 3 нафар психологик ёрдамга муҳтож бўлган аёллар мавжуд. Ушбу тоифадаги аёлларга кўрсатилган мунтазам ёрдамлар натижасида уларнинг 478 нафарини “Аёллар дафтари”дан чиқаришга эришилди. Бундан ташқари, иккинчи секторнинг “Ёшлар дафтари”га жами 529 нафар ёшлар киритилган бўлиб, уларнинг бандлигини таъминлаш ва мунтазам ижтимоий қўллаб-қувватлаш натижамида ёшларнинг 522 нафарини “Ёшлар дафтари”дан чиқарилишига эришилди.
Туман прокурори томонидан аҳоли муаммоларни жойида бартараф қилиш мақсадида сектор ҳудудида режа тузилган. Ушбу режа асосида сайёр қабуллар ва ёшлар билан учрашувлар ташкиллаштирилиб келинмоқда.
Жорий йилнинг ўтган даври мобайнида маҳалла фуқаролар йиғинларида жами 51 маротаба ёшлар билан учрашувлар ўтказилди. Уларда ёшлардан 227 та мурожаатлар келиб тушган. Ушбу мурожаатларнинг 172 тасини ижобий ҳал этишга эришилган.
Хусусан, “Муборак” маҳалласида ўтказилган сайёр қабулда ушбу маҳаллада яшовчи Барот Халилов кўз касалигига чалинганлигини, кўзларини жарроҳлик йўли билан даволаш зарурлигини билдирган. Сектор раҳбарининг ташаббуси билан Б.Халиловнинг кўзлари вилоят кўз касалликлари шифохонасида бепул операция қилинди.
Жорий йилда туманинг Бирлик МФЙ аҳолиси учун давлат хусусий шерикчилик асосида 100 ўринлик “Вазирабону” мактабгача таълим ташкилоти ташкил этилди.
- Мактабгача таълим ташкилотимиз учун иккинчи сектор раҳбарининг амалий ёрдам билан 200 метр масофадан табиий газ тармоғи тортиб келинди, - дейди муассаса раҳбари Вазира Пардаева. - Шунингдек, секторнинг ёрдами билан 1 миллиард сўм миқдорида 1 фоизлик имтиёзли кредит олиб берилди. Бунинг натижасида мактабгача таълим ташкилотимизда “Темир дафтарда” бўлган 1 нафар, “Аёллар дафтари”га киритлиганлардан 3 нафар ва “Ёшлар дафтари”га киритилганлардан 2 нафарининг доимий бандлиги таъминланди.
Ҳозирги кунда мактабгача таълим ташкилотида маҳалланинг 50 нафар болалари тарбияланмоқда. Бу ерда улар учун барча қулайликлар яратилган.
Секторнинг “Ворсин” маҳалласи ҳудудидаги ташладиқ ҳолда бўлган эски мактабнинг биноси реконструкция қилиниб, ҳунармандлар марказига айлантирилди. Мазкур марказда ҳозирги кунда 3 та йўналишда, яъни тикувчилик, тўқувчилик ва каштачилик йўналишларида 12 нафар хотин-қизлар ишлаб келмоқда. Ушбу хотин-қизларнинг 3 нафари “Аёллар дафтари”да турган ишсиз аёллар, уларга субсидия асосида тикув машиналари олиб берилиб, мазкур ҳунармандлар марказига жалб қилинган.
- Мен “Аёллар дафтари”да рўйхатда турардим, - дейди Моҳира Рустамова. - Сектор томонидан менга субсидия асосида тикув машинаси олиб берилди ва мазкур ҳунармандлар марказига ишга жойлаштириб қўйди. Ҳозирда шу ерда иш ўрганиб, тикувчилик қиляпман. Буюртма асосида битта куйлакни камида 60 минг сўмдан тикамиз. Бир кунда ишга қараб 2 ёки 3 та куйлак тикишим мумкин. Даромад ҳам шунга яраша. Рўзғоримга ёрдамим тегаётганидан хурсандман.
Бундан ташқари, мазкур марказдаги аёлларга тикиш-бичиш сирларини ўргантиш учун бириктирилган устоз Г.Асламовага шогирдларига касб-ҳунар ўргатишни йўлга қўйиш мақсадида 4 та тикув машинаси бепул олиб берилган.
Туман прокурори томонидан аҳоли муаммоларини бартараф қилишда вақт ва маблағ талаб қиладиган мурожаатлар секторнинг чораклик “йўл харита”ларига киритилиб, ҳал этилиб келинмоқда.
Абдулазиз Йўлдошев,
Ҳасан Пайдоев
(Халқ сўзи)
комментариев