Каттақишлоқлик Иккинчи жаҳон уруши қатнашчиси, табаррук 100 ёш остонасида турган отахон Асрор бобо Истамов ҳикоя қилади:
...1924 йилда Самарқанд туманидаги Равонак қишлоғида ишчи оиласида туғилганман. 7 ёшга тўлганимда Тойлоқ туманига кўчиб келиб, шу ерда яшаб қолганмиз.
... 1943 йилда Украинанинг иккинчи йирик шаµри Харьковда илк марта жангга кирганлигимни сира унута олмайман. Душман билан тўқнашув жуда шиддатли бўлди. Ўша жангнинг фожиали манзараси ҳамон кўз ўнгимдан кетмайди. Ярадорлар инграб, ёрдамга муҳтож бўлишса-да, ўқ ёмғири остида бунинг сира иложи йўқ эди. Фақат, вақтинча жанг ҳаракатлари тўхтаганидан сўнг ҳарбий шифокорлар тирик қолган аскарларга тиббий ёрдам кўрсатишди. Бир неча қаттиқ жанглардан сўнг душманни шаҳардан қувиб чиқардик. Мен ўнг қўлимдан яраланиб , бир муддат даволандим. Яна жангга кириб ғалаба байрамини Берлинда қарши олиш бахтига мушарраф бўлдим. Берлинда уч ой турганимиздан сўнг, хизматни Руминия пойлахти Бухарестда давом эттирдим. Она юртимга 1949 йилнинг майида қайтиб келдим... Ҳозирда фарзандлар, невара, эвара, чеваралар, келин-куёвлар ва кўплаб яхши инсонлар ардоғидаман. Урушнинг номи ўчсин. Уни биз кўрдик, фарзандларимиз асло кўрмасин. Бугунги дориломон, осойишта кунлар, тўкин ва фаровон замон ўз-ўзидан келган эмас. Буларнинг замирида халқимизнинг фидокорона меҳнати, раҳбарларимизнинг халқпарвар одилона сиёсати турибди, деб ўйлайман. Бу кунларнинг қадрига етмасак, ношукурлик қилган бўламиз. Яна бир гап: Агар Президентимиз кўрсатмаларига қатъий амал қилсак, уйда ўтириб, фойдали иш билан шуғуллансак, барчамизни ташвишга солаётган коронавирус офатидан ҳам тезда қутуламиз.
Юртимизга кириб келган Рамазон ойи барчамизга қутлуғ бўлсин!
комментариев