Доно халқимизда, "Ерни боқсанг, ер сени боқади”, деган ҳикмат бор. Бу бежизга айтилмаган, албатта. Зеро, ерга меҳр берсангиз, у ҳам сиздан ўз мурувватини аямайди.


   Буни туманимизнинг Галаботир маҳалласида истиқомат қилаётган Илҳом Қурбонов яхши тушунади. Шу боис, томорқасининг бир қарич жойи йўқки, бўш турган бўлса. Энг эътиборлиси, Илҳом ака 2018 йилда “Ҳар бир оила тадбиркор” дастури асосида банк кредити олиб, томорқасининг 4 сотих майдонида иссиқхона барпо этган. Айни пайтда эса ушбу иссиқхонада етиштирилаётган помидор кўчатлари ҳосилга кирган.

    — Иссиқхонамиздан ҳар йили 3 маротаба ҳосил оламиз. Даромадимиз ҳам шунга яраша бўлаяпти, — дейди  мақоламиз қаҳрамони. — Ўтган йили ички бозорга 3 тонна помидор киритдик, 20 миллион сўмгача даромад олдик. Бундан ташқари, иссиқхонамизда турли кўкатлар ҳам мунтазам равишда парваришланади.Асосий вақтим иссиқхонада кўчатлар парваришига сарфлайман. Икки нафар келиним ҳам менга қарашади. Оиламиз катта. Харажат ҳам шунга яраша бўлади.  Шу сабабли бир қарич ердан унумли фойдланиб, оилавий даромадимизни оширишга ҳаракат қиламиз. Асло бўш вақтимиз йўқ. Бу орқали рўзғоримиз бут, тану жонимиз соғ.


    Илҳом ака айтганларидек томорқа дастурхонимиз тўкинлиги, ранг-баранглиги бўлибгина қолмай, у саломатлигимизнинг беминнат ҳимоячиси. Томорқада ҳар куни бор-йўғи бир соат ишлаган киши бутун танаси мускулларининг чигилини ёзиб, қон айланишини яхшилайди. Камҳаракатликдан келиб чиқадиган касалликлардан йироқ бўлади.

    -Томорқамизда парваришланаётган картошкалар эрта-индин рўзғорга ярайди. Қолаверса, хонадондаги 5 та зотдор қорамол ҳам рўзғор таъминотида муҳим ўрин тутмоқда. Ҳар куни 20 литр сут соғиб оламиз. Нафақат оиламизни, балки қўни қўшниларни ҳам сут-қатиқ билан таъминлаймиз, -дейди мамнуният билан Илҳом ака Қурбонов.


    Ишлайман, ризқ-насибамни ҳалол меҳнат орқали топаман, деган кишига юртимизда барча шароитлар яратилган. Фақатгина, кишида хоҳиш ва юрагида ўти бўлса бас. Илоҳим, юртимизда ана шундай юрагида ўти борлар кўпайсин.