» » «Ёвуз эртак»нинг зарбаси

«Ёвуз эртак»нинг зарбаси

... Мўлжаллаб қўйган ишларимни битказиб, туман марказидан уйга қайтаётганимда, «Дамас»нинг орқа ўриндиғида ўтириб келаётган икки аёлнинг суҳбати қулоғимга чалинди:

— Опажон, «Ҳовли» нинг кечаги сериясини кўрдингизми? Зўр бўлди-а? Айниқса, Азра сатанг деганига беш кетдим. Ҳамма томонни қойиллатаяпти.

— Нимасини айтасиз... Лекин, кечагисини кўролмадим. Сериал бошланай деб турганда, кенжатойим: «Эна, эртак айтиб беринг!» деб, қистовга олса бўладими? «Мана сенга, эртак!» деб, қулоғининг остига шапалоқ қўйиб юборгандим, додлаб, уйни бошига кўтарди. Дадасининг кайфияти бузилиб, дарров футболга ўтказдилар.

— Ёмон ўргатиб қўйган бўлсангиз керак-да. Мана, менинг иккала кичкинтойим ҳам сериални «миқ» этмасдан кўришади.

— Ўргатиб қўйиш  қаёқ-да?! Ўзи китоб ўқимасам...

Битта-иккита эртакни чала-чулпа биламан. Уларни ҳам анчадан бери айтганим йўқ, эсимдан ҳам чиқиб кетган...

Секин қайрилиб аёлларга разм солдим; иккаласи ҳам кўҳликкина кўринади. Бири-ўттизга ҳам чиққан эмас, назаримда, иккинчиси ундан беш-олти ёш каттароқ бўлса керак...

...Ўқувчилик кезларимизда машҳур шоир Ҳамид Олимжоннинг «Ойгул билан Бахтиёр» эртагини ёд олишга ҳаракат қилганмиз. Асар шундай бошланарди.

Болалик кунларимда,

Уйқусиз тунларимда,

Кўп эртак эшитардим,

Сўйлаб берарди бувим.

...Тинглар эдим бетиним,

Узун тунлар ётиб жим.

Ҳамид Олимжон онаси Комила бувидан, Александр Пушкин энагаси Арина Родионовнадан эшитган эртаклари таъсирида кейинчалик машҳур шоирлар бўлиб етишганини эътироф этишган.

Ўша Комила бувиларнинг авлодлари бўлмиш, биз нима қиляпмиз?! Маънавият тарозисида ҳеч қанча тош босмайдиган, тубанлик, бузуқлик, зўравонлик, бепардаликни ошкора тарғиб қилаётган сериалларга ипсиз боғланиб қолганимиз етмагандай, норасида фарзандларимиздан «кинони «миқ» этмай кўриш»ни талаб қиляпмиз.

Ундан ҳам ёмонроғи, эзгулик етакчиси бўлмиш эртак сўраган жигарбандларимизни шапалоқ билан «сийлаяпмиз».

Меҳр ҳарорати, ифори томиб турган қайноқ кафт билан боланинг бошини силаш қаёқда-ю, унинг эзгулик сари талпинган мурғак қалбини чил-чил қилиш қаёқда?! Аслида, бизга сездирмай, устамонлик билан маънавиятсизлик ботқоғи сари бошлаётган сериалларнинг ўзи биз катталар учун «ёвуз эртак» эканлигини тушунсак-да, уни тан олгимиз келмаяпти. Балки сиз мени ваҳимачиликда айбларсиз, ҳар ким яхши-ёмонни ўзи ажратиб олади, ҳам дерсиз. Фикрингизга ҳеч ким қарши чиқа олмайди, балки ўзингизча ҳақдирсиз.

Лекин, ғайритабиий, ғайримиллий, ғайриахлоқий воқеликни табиий деб, осонгина қабул қиляпмиз, унга кўникиб ҳам қоляпмиз. Мана шуниси жуда алам қилади.

 Дарвоқе, ўзингиз ҳам сериалларни кўряпсизми, дея қизиқаётган бўлсангиз керак. Бунга вақт ажратишнинг иложи йўқ. Мактабда она тили ва адабиёт фани ўқитувчисиман. «Зумрад ва Қиммат» эртаги асосида саҳналаштирилган дарс ўтказишга тайёргарлик кўряпман... 

Қанийди сериал тафсилотини фарзандларингиздан эшитмасам.

комментариев