» » Гиёҳвандликка йўл йўқ!

Гиёҳвандликка йўл йўқ!

Бу йўналишда амалга оширилиши лозим бўлган ишлар кўлами кўп ва улардан энг муҳими – жиноятчиликка қарши кураш, унинг ҳар қандай кўринишлари, шу жумладан, «аср вабоси» номини олган гиёҳвандлик ва у билан боғлиқ аянчли ҳолатларнинг олдини олиш ҳисобланади.
Бу иллат ўтган асрнинг 60-йилларидан бошлаб кенг кўламда бутун дунёга ёйилиб кетди. 
Гиёҳвандлик воситалари ёки психотроп моддалар билан қонунга хилоф равишда муомала қилиш нафақат инсон соғлиги ва хавфсизлигига, балки давлат ичидаги криминоген вазиятга, жамиятнинг иқтисодий, маънавий ва маданий негизига ҳам жиддий таҳдид солишини доимо ёдда тутишимиз керак.
Маълумотларга кўра, бугунги кунда гиёҳванд эркакларнинг ўртача ёши 31, аёлларники эса 28 ни ташкил қилади. Улардан 77 фоизи 39 ёшдан катта бўлмаган шахслар бўлиб, ярмидан кўпроҚи эса 15-19 ёшли ўсмирлардир. 
Гиёҳвандлик моддаларининг инсон организми учун хавфли томони шундаки, агар бирор шахснинг спиртли ичимликларни муттасил истеъмол қиладиган аҳволга тушиб қолиши учун ўртача  икки-олти йил етарли бўлса, гиёҳвандга айланиб қолиши учун бор-йўғи 1,5-2 ой кифоя қилади.
Яхши биламизки, бу муаммо Марказий Осиё давлатларини ҳам четлаб ўтгани йўқ.  Жиноятчилар томонидан бу ҳудуд орқали катта миқдордаги наркотик моддаларни олиб ўтишга бўлган уринишлар сони кўпаймоқда.
Жиноятчиларнинг гиёҳвандлик моддаларини ўтказишга  қизиқаётганликларининг асосий сабаби олинадиган фойданинг ниҳоятда катта эканлигидир. Мутахассисларнинг фикрича, наркобизнесга сарфланаётган ҳар бир сўм камида минг сўм фойда берар экан. 
 Қисқа қилиб айтганда,гиёҳвандликка қарши кураш нафақат ҳуқуқни муҳофаза қилувчи органларнинг, балки кенг жамоатчиликнинг, барча-барчанинг муҳим  вазифаси бўлиб қолмоғи керак. 
Ўз уйимизни, ўз фарзандларимизни, яқин қариндошларимизни ушбу иллатдан ўзимиз асрашимиз шарт. 
 Адолат ТУГАЛОВА.

комментариев