Жиноят - давлат қонунчилигининг қўпол бузилиши бўлиб, бу унга йўл қўйган шахснинг жамиятдаги обрўсига путур етказади, моддий ва маънавий зарар кўришига сабабчи бўлади, энг ёмони - оиласи ва яқинларидан айириб, озодликдан махрум қилади. Халқимизда “Юрсанг саёқ - ейсан таёқ” деган нақл бор. Лекин... бу нақлга “Элибоев Достон” (исм ва шарифлар шартли танланган) амал қилмайди. “Элибоев Достон” жиноий қилмиши учун озодликдан махрум қилиниши тўғрисида билса ҳам ўзининг жирканч қилмишини содир этишда давом этган. У яшаш манзилида халол меҳнат қилиб, деҳқончиликнинг ортидан кун кечирарди. Д.Элибоев кунларнинг бирида фойдали меҳнат қилиб эмас, осон йўл билан пул топишни истаб қолди. Шу мақсадда 2020 йилнинг ноябрь ойида Ургут тумани “Қолдивожар” маҳалласида яшовчи яқин дўсти “Раим”дан “героин” гиёҳвандлик моддасини сотиб олиб, уйида ушбу модданинг бир қисмини ўзи истеъмол қилган. 
Сўнг, пул ишлаш мақсадида ўзининг истеъмолидан қолган “героин” гиёҳвандлик моддасини сотиш учун мижоз қидира бошлаган. Шу орада Д.Элибоев ҳуқуқни муҳофаза қилувчи органларнинг назарига тушган.
2020 йил 25 ноябрь куни Д.Элибоев 0,1 грамм “героин” гиёҳвандлик моддасини “Азиз” ва “Бобир” исмли шахсларга сотаётган вақтида ҳуқуқни муҳофаза қилувчи орган ходимлари томонидан жиноий қилмиши фош этилди ва қўлга олинди. У тергов жараёнида бу гиёҳванд моддани ўзи истеъмол қилиш учун “Раим” исмли дўстидан олганлиги ва истеъмолидан қолган миқдорини сотмоқчи бўлганлигини тан олди.
Гиёҳвандфурушнинг жиноий қилмиши гувоҳларнинг кўрсатмаларида ҳам тасдиқланди. Жиноят ишлари бўйича Ургут туман судида Д.Элибоев Ўзбекистан Республикаси Жиноят Кодексининг 273-моддаси, 2-қисми билан айбдор деб топилди ва 6 (олти) йил муддатга озодликдан маҳрум қилиш жазоси тайинланди. 
Шу тариқа осон пул топиш мақсадида қонунни қўпол равишда бузган гиёҳвандфурушнинг қилмиши фош этилиб, қинғир ишларига чек қўйилди. 
Бугинги кунда ушбу жирканч иллатнинг орқасидан жамиятда салбий оқибатлар, уларни истеъмол қилиш натижасида эса аҳоли генефондининг зарарланиши каби холатлар юзага келмоқда. Бунинг олдини олиш учун ўсиб келаётган ёш авлодни зарарли офатлардан асраш хар бир фуқаронинг бурчи эканлигини яна бир бор англамоғимиз даркор. 
Пўлат ҒАФФОРОВ