Joriy yilning 11–14-fevral kunlari Farg‘ona shahridagi “Samo” sport majmuasida sambo va jangovar sambo bo‘yicha kattalar (erkaklar va ayollar) o‘rtasida O‘zbekiston chempionati bo‘lib o‘tdi. Mazkur nufuzli musobaqada respublikamizning barcha hududlaridan 450 nafardan ziyod sportchilar ishtirok etdi.
Chempionatda tumanimiz sportchilari ham munosib qatnashib, yuqori natijalarni qayd etishdi.
65 kg vazn toifasida Osiyo chempioni, sport ustasi, tuman Bolalar va o‘smirlar sport maktabi murabbiyi Sarvinoz Esanova barcha raqibalarini mag‘lub etib, O‘zbekiston chempioni  nomiga sazovor bo‘ldi.
Tumandoshlarimiz Azizabegim Najimova (59 kg gacha), Mashhura G‘anieva (65 kg gacha)lar ham sovrindorlar safidan munosib joy olishdi.
Toyloqlik sportchilar Osiyo va Jahon chempionati hamda Jahon kubogi musobaqasida ishtirok etadigan O‘zbekiston milliy terma jamoasi zaxirasidan o‘rin olib, xalqaro maydonlarda yurtimiz sharafini himoya qilish imkoniyatiga ega bo‘lishdi.