Жорий йил 3 ой мобайнида туманимизда 13 та ёнғин содир бўлган. Натижада аҳоли мол-мулкига, уй-жойига жиддий шикаст етган. Ёнғинларнинг содир бўлишида асосий сабаблар иситиш печларидан нотўғри фойдаланиш, электр тармоқлари носозлигидир.
Шундай экан, ўзингиз ва яқинларингиз ҳаётини, уй-жойингизни ёнғиндан асраш мақсадида ёнғин хавфсизлиги қоидаларига амал қилишингизни сўраймиз:
— Уйда газ ҳидини сезсангиз, эшик ва деразаларни очиб, хонани шамоллатиб, бу ҳақда зудлик билан газ идорасига 104 рақами орқали хабар беринг.
— Гугурт чақманг, чироқни ёқманг. Уйдан чиқиб кетаётганда, электр иситкич ва газ ускуналарини ўчиришни унутманг.
— Иситиш печлари ва уларнинг тутун чиқиш мўрилари яроқлилигини куз-қиш мавсуми олдидан кўрикдан ўтказинг. Тутун чиқиш мўриларини атрофи камида 1 метр айланасига тахта ва бошқа ёнувчи нарсалардан узоқда жойлаштиринг.
— Ёш болаларни уйда назоратсиз қолдирманг. Уларга электр ва газ асбобларидан фойдаланишни буюрманг.
— Маҳалла ва уйларга олиб борувчи кўчаларни сунъий тўсиқлар билан тўсиб қўйманг.
— Яшаш уйларида газ печларини белгиланмаган жойларга ўрнатманг. Уйларда носоз, ишга яроқсиз ва ишлаш муддати ўтиб кетган, синовдан ўтмаган маиший газ баллонларидан фойдаланманг.
— Агар қозонда ёғ ёниб кетса, унга сув сепмасдан, қоп-қоқни ёпиш керак.
— Телевизор ва бошқа электр асбобларида ёнғин содир бўлса, биринчи навбатда, уларни электр манбаидан ўчиринг.
— Давлат стандартига мос бўлмаган, камин туридаги чет мамлакатларда ишлаб чиқарилган иситиш ускуналаридан фойдаланманг.
— Ностандарт ва қўлбола сақлагичлар ҳамда вақтинча ўтказилган электр симларидан фойдаланманг. Электр симларини бурама ёки қаттиқ тортилган ҳолда ўтказманг.
— Розеткага бир вақтнинг ўзида бир нечта маиший электр ускуналарининг уланишига йўл қўйманг.
— Том чордоқларида сомон, ёқилғи-мой, тез ёнувчи нарсаларни сақламанг.
— Молхона ва ем-хашак сақлаш хоналаридаги ёритиш чироқлари ва электр симларини қоида талаблари асосида ўтказинг.
Шоҳжаҳон ХУДОЙҚУЛОВ,
туман ЁХБ инспектори, лейтенант.
комментариев